حوار ناري مع كبير مشاغبي كرة القدم المغربية يدلي فيه بأشياء خطيرة /حصريا على منتدى كورة مغربية

من طرف ilhamlhbiba الأحد نوفمبر 22, 2009 11:01 am

مقدم البرنامج :عفاك شكون هو المشاغب ؟

مشاغب :قبل ما نبدى معاك الإستجواب بغيت نقول ليك واحد المعلومة

مقدم البرنامج : تفضل ،تفضل ٠

مشاغب : هاذشي اللي غادي نعاودو ليك اليوم راه ممنوع على اللي لعمر ديالهم يقل على خمسين سنة ٠

مقدم البرنامج : حتا نتا خاصك تعرف بأنك فبرنامج من لا برنامج له ٠

مشاغب :ماقلتي عيب ٠٠٠ شوف ألعشير المشاغبين فيهم جوج نواع : الصقور والحمائم ٠

مقدم البرنامج : نتا باينا فيك من الصقور ؟

مشاغب : تبارك الله عليك ، عندك عين ثاقبة ٠

مقدم البرنامج : بغيت نبدى معاك من مرحلة الطفولة ٠ واش كنتي كتلعب فصغرك ؟

مشاغب : بطبيعة الحال ٠

مقدم البرنامج :شنو اللي كان كيعجبك بزاف : كاش كاش ولا حابة ؟

مشاغب : كاش كاش ، حابة ٠واقيلا هاذ السميات ديال شي بيمو ؟

مقدم البرنامج : ؟! واخة ، شنو هو اللعب اللي كنتي كتبغي ؟

مشاغب : الحرب ٠

مقدم البرنامج : الحرب ؟؟ !!

مشاغب : كان واحد ولد حومتي مسميين عليه التيساع كيجمع الدراري الصغار ديال الحومة وكيعطي لهذا سلسلة ولهذا مقدة ولهذا منشار ٠٠٠ وكيقول لينا يلاهو نهجموا على شي حومة ٠٠٠ إلى الأماااام ٠

مقدم البرنامج :زيد

مشاغب : الحومة اللي دخلنا ليها كنجعلوا سافلها عاليها ٠

مقدم البرنامج :كيفاش ؟

مشاغب : كنبداوا نصونيوا على الديور ونهربوا ، إلا بانت لينا شي مرا دايا الخبز للفران كنقلبوه ليها ، كنهرسوا البولات ديال الجرادي ، إلى كانوا شي دراري كيلعبوا كورة كنسرقوها ليهم ، ولي ولي آش كنديروا لولاد ماما غطيني بلعصى ٠٠٠

مقدم البرنامج : صافي صافي، فهمت ٠٠٠ باش كبرتي شوية شناهو الحدث اللي باقي عاقل عليه مزيان ؟

مشاغب : واحد النهار دخلوا البوليس للحومة ٠ قاليك بغاوا يشدوا شي بزناز ٠

مقدم البرنامج : إوا

مشاغب : هذاك النهار الحومة كلها وقفات وقفة رجل واحد٠ جبدنا جميع الأسلحة البيضاء المتواجدة فوق الكرة الأرضية ، وخويا الصغير باقي ماقفلش خمس سنين حتى هو هاز مقص ديال الظفار ٠

مقدم البرنامج : زيد

مشاغب : إوا الصطافيط ديال البوليس باش جات باش دارت ٠

مقدم البرنامج : بغيت نسولك شكون هو المغني اللي كيعجبك ؟

مشاغب : الشاب بلال ٠

مقدم البرنامج : شنو هي الأغنية اللي كتبغي بزاف ؟

مشاغب :الأغنية اللي كتسالي معايا هي : أنا وياك أنا وياك نسكروا اليوم ، أنا وياك أنا وياك نتقرقبوا اليوم ، أنا وياك أنا وياك نخسروا اليوم

فهاذ الأثناء مشاغب ناض كيغني وكيشطح ٠

مقدم البرنامج : واجلس راك على الهواء أصاحبي ٠ واش مايمكنش تغني بلا ماتشطح ؟

مشاغب : ومنين كيوصل الديسك لأنا وياك أنا وياك نخسروا اليوم٠ كنجبد واحد الصمطة ديال القرقوبي وكنبلعها على الريق ٠

مقدم البرنامج : يالطيف ٠

مشاغب : ومن بعد كنجبد واحد مولاتي الطريفة ديال لحشيش وكنبقى برم ياما تبرم ، فتخ ياما تفتخ ، كمي ياما تكمي ، تكيف ياما تكيف ٠٠٠ حتى ماكنبقاش عاقل على راسي ٠

مقدم البرنامج : ومالك على حالتك أولدي ؟

مشاغب :ومن بعد كنجبد الجنوية وكنبدى نضرب ونخطط فلحمي : هاذي تنفع ، هاذي تضر ٠٠٠

مقدم البرنامج : كمل

مشاغب : إوا كنشدوا الرحال للملعب

مقدم البرنامج : نتا ومن ؟

مشاغب : أنا ولخصمان ٠

مقدم البرنامج : الخصمان ؟

مشاغب : يعني لعشران ديالي ٠

مقدم البرنامج : آش كتديروا فالملعب ؟

مشاغب : كاينا واحد الغابة كتواجد قرب الملعب كنتخباوا فيها من مور الشجر أو وسط الربيع وكنبداوا نتسناوا شي قافلة تدوز ٠

مقدم البرنامج : قافلة !!؟؟

مشاغب : غير كيوقف شي كار فيه شي مشجعين جايين من شي مدينة باش يتفرجوا فالفرقة دالهم ٠ كنخرجوا ليهم من كل حدب وصوب ٠

مقدم البرنامج : !!!؟؟؟

مشاغب : كنقتلوا بوهم عصى وكنحيدوا ليهم فليساتهم وحويجاتهم وفبعض الأحيان كنديروا ليهم هذاك الشي اللي مامز٠٠٠

باش سمع مقدم البرنامج هاذ لكلام بدى كيتقيا حشاكم ٠

مشاغب :ياك قلت ليك فبداية البرنامج بأن كلامي ممنوع على اللي السن ديالهم كيقل على خمسين سنة

مقدم البرنامج : حتى نتا شاركتي معاهم فهاذ الجرائم ؟

مشاغب: مانكذبش عليك ، سلخت ، سرقت لفلوس ، حيدت لحوايج ، ولكن هاذيك اللخرانية مادرتهاش ٠

مقدم البرنامج : ٠٠٠٠٠٠

مشاغب :مالك كتشوف فيا هاذوك الشوفات واش متقتيش بيا ، والله مكانكذب عليك ، بليمارا هاذيك الساعات كنت باقي مابلغت ٠

مقدم البرنامج : مع الأسف ، مع الأسف ٠٠٠

مشاغب : لا بلا ما تأسف راه حتى حنا منين كنمشيوا لمدينتهم كيردوا لينا الصرف ٠

مقدم البرنامج : !!؟؟ فكرني ، شكون هو الزعيم ديالكم ؟

مشاغب : التيساع ٠

مقدم البرنامج : من خلال الأبحاث اللي قمت بها سمعت بأنك نتا هو اليد اليمنى ديالو ؟

مشاغب : ٠٠٠٠٠٠٠٠

مقدم البرنامج : واجاوب مالك ساكت

مشاغب : أخجلت حيائي ٠

مقدم البرنامج : ياه نتا كتحشم ؟

مشاغب :اللي خاصك تفهم هو أن الهم ديالي هو الشغب ماشي المناصب ، وإلى نجحت شي نجاح الفضل كيرجع فيه للطاقم التقني كامل ٠

مقدم البرنامج : تكلم ليا على شي حدث عشتيه مع التيساع ؟

مشاغب : واحد النهار مشينا لواحد لمدينة باش نتفرجوا فالفرقة ديالنا ٠ سلا الماتش خرجنا من التيران رمقونا شي مشاغبين ديال هاذيك لمدينة كنا دايرين معاهم شي حساب خايب منين جاوا عندنا لمدينتنا ٠

مقدم البرنامج : باختصار ، وقت البرنامج لا يرحم ٠

مشاغب :إوا هوما يتبعونا ٠

مقدم البرنامج : شحال العدد ديالهم ؟

مشاغب : التيران كلو تبعنا ٠

مقدم البرنامج : إوا

مشاغب : حنا هاربين وهوما تبعينا ، قطعنا الشانطي ومازال تبعينا ، دخلنا للغابة وتقول واش بغاوا يتعاتقوا معانا ٠

مقدم البرنامج : أهاه

مشاغب : شفنا حتى عيينا وقفنا شهرنا السيوفا ديالنا ٠

مقدم البرنامج : التيساع حتى هو وقف ؟

مشاغب : التيساع بقى كيجري يلاه بغى يقطع السكة وهو يضربو واحد التران مخلا فيه حتى عظم ٠

فهاذ الأثناء مشاغب بدى كيبكي ٠٠٠

مقدم البرنامج : شفتي الشغب فين كيوصل ٠

مشاغب باقي كيبكي ٠٠٠

مقدم البرنامج : سمح لي بغيت نسولك واحد السؤال وما تديرهاش مني قلت الصواب ٠ علاش نتا داير هكذا ؟

مشاغب : حيث مالقيتش اللي يهدر معايا ويوجهني ٠٠٠